Heb 10 | KYG | STEP | Goti'a Yu vaya'mo apami'niya ke'aepa gemo'mo alagepa aune kava'mo ohane'nifa alagepa kava'mo Goti'a afole aigiye, huno hu male'niya kava'mo alino lave lisiyafe'mo yegemo aune'agana huno hane'niye. Kafuga'ae kafuga'ae'mo afumo he'a ami'naya'monanafa ani agufa ofalinimo'a alagepa hu'a maige maige hu'a maisayafe'mo Gotitegamo ne'vaya vaya'mo alagi alino alagepa huno o'apategaiye.

Hebrews 10

1 Goti'a Yu vaya'mo apami'niya ke'aepa gemo'mo alagepa aune kava'mo ohane'nifa alagepa kava'mo Goti'a afole aigiye, huno hu male'niya kava'mo alino lave lisiyafe'mo yegemo aune'agana huno hane'niye. Kafuga'ae kafuga'ae'mo afumo he'a ami'naya'monanafa ani agufa ofalinimo'a alagepa hu'a maige maige hu'a maisayafe'mo Gotitegamo ne'vaya vaya'mo alagi alino alagepa huno o'apategaiye. 2 Alagi alino alagepa huno apateyesinana mago'e hu'a Goti'mo ofalinimo alagi o'ami'naesine. Mono hu'naya vaya'mo aeno kalo paeno apateyesinana apakupi mafa'nemo'a hosu kavatapimo hane'niye, huno osu'niyesine. 3 Huno osu'niyesina'monanafa ani agufa ofalini kavatefe'mo muki kafuga'ae kafuga'ae'mo hosu kava'apie'mo apake okani'a apakesa afifi hu'a mai'nae. 4 Pulumakamo kola'mo'e mememo kola'mo'e'mo hosu kava'apimo afa'a alino o'atalegaiye.

5 Afa'a alino o'atalegaiya'mofe'mo Kalaisi'a ma mopafi'mo emi'neno'ae'mo,

Afumo he'a nekamiya kava'e ofalinimo nekamiya kava'efe'mo alagi okahau'niya'mofe'mo nagufamo alika alo huka nate'nane. 6 Kagaemo afumo he'a hi'yalamute'mo male'ne'a nekaya kava'e hosu kava'apilefe'mo afumo he'a nekamiya kavate'efe'mo amuse huka o'apate'nane. 7 O Gotiyo, mukukafi'mo nava gemo huka avo'mo kae male'nane. Ani gelefe'mo kahau'niya kava'mo hisuvafe'mo ago emi'ne'nove, hu'na hu'nove,
huno hu'niye. 8 Hogoteno huno'ae'mo,Afumo he'a nekamiya kavanagi ofalinimo nekamiya kavanagi afumo he'a hi'yalamute'mo male'ne'a nekaya kavanagi hosu kava'apilefe'mo nekamiya kavanagi huno okahau'niya'mofe'mo amuse huka o'apate'nane, huno ha pai'niye. Ani kava'mo nehu'apae'mo ke'aepa gemo akame nehaya'monanafa amuse osu'niye. 9 Inagi henaga'amo huno'ae'mo,O Gotiyo, kahau'niya kava'mo hisuvafe'mo emi'ne'nove, huno ha pai'niye. Inagi Goti'a henaga'amo afole ai'niya kava'mo alino afole aino atesiyafe'mo hogote kava'mo ago alino atale'niye. 10 Yesu Kalaisi'a Goti'mo hau'niya kava'mo hu'niya'mofe'mo muki afinatefe'mo magoke afina'mo agai'a agufa'amo ami'niya ofalinileti'mo hosu kavatimo alagi aeno kalo pae'nigeta laote alagepa vaya'amo mai'none.

11 Muki Yu vaya'mogimo mono hu'a ne'apataya vaya'mo he ti'a mai'ne'apae'mo muki afina'ae afina'ae'mo ali'ya'mo ne'ali'apae'mo ani agufa ofalinimo amige amige hu'a mai'naya'monanafa ani agufa ofalinimo'mo hosu kava'apimo afa'a alino o'atalegaiye. 12 Nehaya'monanafa ani vekamo'a muki afinatefe'mo magoke ofalinimo amiteno Goti lamaga haopale'mo fai mai'niye. 13 Ani afinateti'mo Goti'a kame vaya'amo alino aiyafi'mo apatesiyafe'mo agava ne'maiye. 14 Agaemo magoke ofalinimo amiteno apavaleno apaote'mo apate'neno alagi alino alagepa huno apate'niyanage'a alagepa hu'a maige maige hu'a maigae. 15 Agaemo ani kavateti'mo laha paiteno Aote Auneme'amo'e'mo aeno hakalo huno laha paino'ae'mo, 16 Ala kava ne'mo'a,

Ani agufa kotalake gemo afole aisiya afina'mo apakaetegamo hu malegauve. Ke'aepa ge'nimo ali'na apaipafi'mo malete'na apakesafi'mo avo kae malegauve, huno hu male'niye,
17 huno huteno mago'e gemo huno'ae'mo,

hosu kava'api'e ke'aepa ge'nimo amagi'a atale'naya kava'apile'efe'mo mago'e hu'na nagesamo o'afi'na afa'a nagekani'na apategauve,
huno hu'niye. 18 Goti'a hosu kava'apimo ago alino atale'niya'mofe'mo hosu kava'apilefe'mo halate amisaya ofalinimo alagi ohane'niye.

Koli osuta Goti haopale'mo vigetao, huno hu'niya gemae

19 Konaga'nimogitapae, ani gemo hu'niya'mofe'mo koli osuta Yesu kola'aleti'mo alagi aote mono nopi'mo faleta haigetao. 20 Agaemo lavolavo kitamo ago yakino late'niyanageta agufaleti'mo saufa ka'mo maige maige huta maisuna ka'mo ago valino late'niya'mofe'mae. 21 Siosi vaya'aite'mo yagaino ne'apateya vekamo mai'neno Ala kava netimo mono huno nelateya vekamo mai'niya'mofe'mo 22 lama ge laipamo nekalita lole lagesamo o'afita lokiya vaita lagesa afita fatago nehutae'mo Goti haopale'mo haigetao. Laipafi'mo aino fuli fuli huno late'nigeno'ae'mo yu'ilaga vekatimo'mo hosu kavatapimo hane'niye, huno nosiye. Lagufale'mo alagepa aniteti'mo lagufale'mo faleno late'niyanagi haigetao. 23 Ani kava huguve, huno laha pai'niya vekamo'a ge'amo aeno o'atagaegaiya'mofe'mo agava ne'maita lavayagunagu nehuna kavatefe'mo lole lagesamo o'afita atafauta alagi higetao. 24 Lagaemo alita he tita apatesunage'apae'mo hapau apayamopafi'mo hapauge alagepa kava'mo huge hisayafe'mo konagatie'mo lagesa afifi huta maigetao. 25 Mago vaya'mo ali'a anupa hu'a ne'maiya kava'mo atale'naya'mofe'mo o'ataleta alagepa kava hiyo, huta hapa paisunage'a laha paisageta alita anupa huta maigetao. Alopa afina'mo ne'egetapa ne'agaya'mofe'mo ani kava'mo mago'e hutapa hiyo.

26 Lagaemo lama gemo ago ageta alagepa huta age'nona'mofe'mo amagita atalesunafe'mo, kanalene, huta hisunana hosu kavatimo aeno kalo paeno atalesiya ofalinimo alagi ohane'niye. 27 Ohane'niya'mofe'mo Goti'a agoti huno latesiya kavafeke'mo koli huta agava maisuna kava'mo hane'niye. Aipamo leno ne'apatesigeno'ae'mo kame vaya'amo atamo'mo leno apasaga ligiye. 28 Muki vaya'mogimo Mosese ke'aepa gemo ago amagi'a atalete'apae'mo afa gemo hane'niye, hu'a hu'naya vaya'mo ago fali'nae. Agoti gemo ne'afiyategamo lole vekala'moganimofi lole'e mago'e vaya'mogimofi hu'a apakaefe'mo, hosu kava'mo hu'nae, hu'a hu'nage'apae'mo hapau hu'a o'apate'a kamiti apamagi'nae. 29 Inagi mago vekamo'a Goti Mafa'ne'ae'mo, ina agufa vekae, huno agi'ale'mo alino afepi atege kotalake kola'amo alino aote male'niya kola'ae'mo ina agufa kolane, huno agesamo afige fiku hapa maeno ne'apamiya Auneme'ae'mo huno faipa huno atege hu'nisiyana anona'alefe'mo mago'e huno lusi kayo'mo alisiya vekamo mai'niye, hu'a apakesamo afigae. 30 Ala kava ne'mo'a,hosu kava'apimo anona'apilefe'mo ae'na atagaina hu'na kayo'mo ne'apamuva vekamo mai'nove, huno hu'niya vekamo ago age'none. Mago'e gemo huno'ae'mo,Ala kava ne'mo'a vaya'amo alino fako huno apategaiye, huno hu male'niye. 31 Goti'a afa'a ne'maiya vekamo mai'niya'mofe'mo ayapi'mo apatafauno mai'nisiya vaya'mogimo lusi kava hu'a koli hisaya kava'mo hane'niye.

32 Hogotetapa mai'naya kavafe'mo lapakesamo afita ho hiyo. Goti'a ha le ya'amo'mo lapaipafi'mo aeno ha le'nigetapa age'nae. Agetetapae'mo lusi hanageke ya'mo ali'netapae'mo o'ataleta lokiya vaitapa lapayamufa vale'nae. 33 Lapakaemo vaya'mogi vaya'ai apaulagale'mo hu'a faipa hu'a nelapate'a lapakaetegamo hosu kava'mo hu'naya agufa hanageke ya'mo alige mani agufa kana ya'mo ali'naya vaya'e'mo afalu afalugana hutapa ne'maiya agufa hanageke ya'mo alige hutapa mai'nae. 34 Nagaemo kalavusifi'mo mai'nogetapae'mo lapau hutapa nate'nae. Kagemi yatapimo kumaya'mo ali'nagetapae'mo kanalene, hutapa hu'nae. Hogote kagemi yatimo koku'napi'mo okasalisiya kagemi yatimo hane'niye, hutapa lapaipafi'mo lapakesamo afi'naya'mofe'mae. 35 Ani kava hutapa mai'naya'mofe'mo o'ataletapa atafauta alagi hutapa maiyo, alopa miyatapimo aligayanagi. 36 Lapakaemo Goti'a hau'niya kava'mo hutetapa lapamiguve, huno hu'niya ya'mo alisayafeke'mo atafauta alagi hutapa maiyo. 37 Ani kavatefe'mo Goti mukufi gemo'mo huno'ae'mo,

Aise afina'mo utesigeno eminesiya vekamo alagi eminegaiye. Gemo afino o'maigifa malage huno eminegaiye. 38 Inagi fatago vaya'mo apakesa afi'a fatago nehaya kavateti'mo alagepa hu'a maigaya'monanafa mago vekamo halate ataleno aino atagi neno u'nisiyana alagi aise'amo amuse hu'na o'ategauve,
huno hu male'niye. 39 Huno hu male'niya'monanafa lagaemo atale'a ai'a atagi ne'a u'a lageso nehaya nofi vayapati'mo o'mai'nona'monanafa lagaemo apakesa afi'a fatago nehageno apakufamo alino katino ne'apateya nofi vayapati'mo mai'none.